Четиристотини и педесет матуранти од трите охридски средни училишта ОСУ „Св. Климент Охридски“, ОЕМУЦ „Св. Наум Охридски“ и ОУТУ „Ванчо Питошески“ денеска точно на пладне на Градскиот плоштад по 9-ти пат го изиграа квадрилот од оперетата „Лилјакот“ на Јохан Штраус.
Охридските матуранти полнолетството го прославија играјќи синхронизирано со илјадници нивни врсници од Скопје, Струга, Струмица, Гевгелија и уште 60-тина градови од 11 држави од Југоисточна Европа, како дел од манифестацијата „Матурска парада“ што 13 години со ред го организира Сојузот на танчерите на Република Словенија.
Матурантите од Охрид ги поздрави градоначалникот Никола Бакрачески, посакувајќи им среќа, здравје и успех во животот, како самостојни личности да ги исполнат своите мечти во светот на возрасните.
– Пред вас е отворен патот што секој до вас поединечно ќе го осмислува, секој посебно ќе го поминува. Бидете достоинствени, но и храбри, да се соочите со предизвиците што ќе се исправат пред вас. Бидете цврсти во одлуките да напредувате во животот, само на начин што нема да ги наруши човековите етички вредности, истакна меѓу другото Бакрачески.