Владата донесе одлука со која на општина Охрид и се доделува нов двокатен туристички автобус, наменет за турситичко разгледување на знаменитостите низ градот.
Во соопштението на советничката група на ВМРО-ДПМНЕ во Советот на општина Охрид, по повод таквата одлука се оценува дека подарокот ќе биде од голема корист за Охрид како туристички град затоа што евидентен е недостаток, но и потреба од таков панорамски автобус со кој би се превезувале туристите низ Охрид. Автобусот што има и отворен дел и кој брои 60 седишта, ќе овозможи и организација на т.н. „сајт-сиинг“ тури низ градот и околината, истиот ќе се брендира во контекст на Охрид и ќе ја збогати туристичката понуда, а со тоа и приходот од туристичките движења низ градот.
Советникот Дејан Пановски појасни дека на следната седница на Советот ќе побараат да се постави точка на дневен ред за донесување одлука за прием во сопственост на двокатниот автобус после која ќе биде склучен договор меѓу Министерството за транспорт и врски и општината за превземање на возилото, а истото да се користи во туристички цели и за туристичка промоција.