Непознати сторители извршиле тешки кражби во црквите „Свети Петар и Павле“ во Долна Бањица и „Свети Ѓорѓија“ во Здуње, Гостиварско, информираат од СВР Тетово.
– Крадците, најверојатно синоќа со насилно отварање на споредната влезна врата на храмот во Долна Бањица, влегле во бањичката црква и од местото за продажба на свеќи ги собрале парите кои биле оставени. Тие, исто така, ја отвориле и влезната врата од помошниот објект на црквата, но таму ништо не одзеле, изјави портпаролот на СВР Тетово Марјан Јосифоски.
Јосифоски потврди дека, исто така, непознати сторители насилно провалиле и во црквата „Свети Ѓорѓија“ во селото Здуње. Најпрво го отстраниле катинарот од металната заштитна решетка, потоа ја скршиле цилиндер бравата на дрвената влезна врата и по пребарувањето на внaтрешноста на објектот од масичка за продажба на свеќи одзеле помал сума на пари.
Екипи на СВР Тетово извршиле комплетен увид, пронајдените траги се дадени на вештачење и се превземаат активности за расветлување на сите поединости и за откривање на сторителите.