Поранешниот градоначалник на Општина Карпош, Стевчо Јакимовски, засега нема да ја започне издржувањето на затворската казна во КПУ „Скопје“ во Шуто Оризари, иако требаше да се јави на 2 јули.
Од Кривичниот суд информираат дека Јакимовски поднел барање за одложување на извршувањето на казната поради здравствени причини, а постапката е во тек. Судијата за извршување санкции побарал проверка на приложената медицинска документација пред да донесе одлука.
„Судијата за извршување санкции по приемот на барањето веднаш пристапил кон проверка на приложената медицинска документација. До двете приватни здравствени установи кои ја издале документацијата се доставени барања за проверка на 15.06.2026 година, како и ургенција на 26.06.2026 година. По овие барања сè уште се чека одговор, по што ќе може да се донесе соодветна одлука“, соопштија од Судот.
Јакимовски неодамна беше правосилно осуден на една година затвор со пресуда на Апелацискиот суд, во предметот поврзан со изградбата на општинската зграда на Општина Карпош.
Во изречената казна му се пресметува и времето што го помина во притвор, односно пет месеци, што значи дека доколку започне со издржување на казната, ќе треба да одлежи уште околу седум месеци.