Бранителот на обвинетиот Влатко Кешишев, адвокат Игор Ефремов, денеска во Основен кривичен суд Скопје побара ослободителна пресуда за неговиот клиент во врска со убиствата на Вања Ѓорчевска и Панче Жежовски, со образложение дека тој не само што не учествувал, туку ниту знаел, ниту имал намера тоа да се случи. Евентуална вина, како што посочи, може да сноси само за грабнувањето на Вања.
– Од доставените и изведени материјални докази на кои се темели обвинителниот акт на обвинителството, како и од распитот на сите сведоци и обвинети, со ништо не се потврди учеството во дејствие на сторување како извршител или соизвршител на обвинетиот Кешишев. Ова дополнително се потврди и од самиот распит на обвинетиот Влатко Кешишев, како и од распитот на обвинетиот Велибор Манев, но и од исказот даден во обвинителство на обвинетиот Боре Видевски, рече адвокатот.
Дополни дека обвинетиот не може да биде ниту обвинет, а уште помалку осуден како соизвршител, бидејки за да истиот биде соизвршител е потребно неговите дејствија да се неопходно потребни за извршување на кривичното дело кое му се става на товар, а такви дејствија од негова страна, според адвокатот, не постојат.
-Имајки предвид дека за постоење на соизвршителство од член 22 од ЗКП е потребна свест и умисла кај соизвршителот дека врши дејствие на извршување на некое кривично дело и истиот го сака неговото извршување, во обвинителниот акт ниту е посочена умисла ниту свест за вршењето на дејствијата од страна на обвинетиот Влатко Кешишев, ниту пак такво нешто може да се заклучи од изведените докази, рече Ефремов.
Го потенцираше каењето на Кешишев поради неговото присуство на местото пред зградата на улица „Наум Наумовски Борче“ каде живеела сега оштетената Вања Ѓорчевска, и неговото учество во сторување на кривично дело грабнување.
-Бараме од судот, при донесувањето на одлука за обвинетиот Кешишев, особено да го има во предвид фактот дека да не беше каењето и товарот на совеста на обвинетиот, немаше да бидат пронајдени ниту телата на убиените односно со негов особен придонес при распитот пред полициските службеници го посочил местото на закопувањето на оштетените. Како и што посочи самиот, слушајки ги наредбите од Палевски, превземал дејствија без да размислува за можни последици. Состојбата на неговата совест и каењето, но и стравот којшто го имал целосно е опишан во неговата прва реакција вечерта при претресот во седиштето на партијата каде на полицискиот службеник – сведокот Дејан Димовски му кажал, цитирам – кај сте до сега ве чекавме, рече Ефремов.
Одбраната тврди дека Кешишев бил во состојба на страв и подложност кон Палевски, што го потврдува со фактот дека, откако слушнал за настаните во Велес, побарал да се врати во Штип, но не му било дозволено. Овој момент, според одбраната, покажува дека Кешишев всушност бил заложник и жртва на туѓи одлуки и интереси.
Тој признава дека бил присутен при грабнувањето на Вања Ѓорчевска на 27 ноември 2023 година, но вели дека не знаел која е личноста, бидејќи информацијата ја имале само Манев и Палевски.
-Како што посочи самиот никогаш не му било кажано од никого, ниту пак учествувал во било какви разговори кои би се одвивале за можно убиство на било кого. Во својот исказ посочи дека слушнал звук што наликува на пукање од пиштол, по што по неколку минути бил повикан да помогне во закопување на некое лице. За прв пат дознал дека станува збор за малолетно лице кога се вратил во седиштето на партијата, кога видел на социјалните мрежи, по што го прашал обвинетиот Палевски дали тоа е личноста од утрото, на што му било најостро наредено да оди во својата соба и да не поставува дополнителни прашања, образложи адвокатот.
Одбраната истакна дека обвинетиот Кешишев бил цело време на располагање на истрагата и со неговата соработка значително придонел кон расветлување на случајот. Побара од судот непристрасно да ги оцени фактите и да не му се припишува вина за дела за кои нема докази дека ги сторил, ниту како извршител ниту како соизвршител.
Адвокатот Бојан Манев, бранител на обвинетиот Боре Видевски во случајот за убиствата на Вања и Панче, побара судот да донесе ослободителна пресуда, посочувајќи дека обвинителството не ја докажало вината на неговиот клиент.
-Сметам дека овде имавме целосно неподготвен и непотполн предмет без релевантни докази. Од тие причини, најмногу поради фактот што по Устав и закон нашата држава која денес се вика Република Северна Македонија е правна држава, судот во изреката на оваа пресуда треба да се води од темелните начела на правната наука и да донесе ослободителна пресуда, рече Манев.
Тој потенцираше дека обвинителство и со ниту еден доказ не го докажало учеството на Видевски во кривично правните настани.
-Барам ослободителна пресуда за обвинетиот Боре Видевски бидејќи обвинителството буквално со ништо не го докажа неговото учество во кривично правните настани, најмногу затоа што тој во ниту еден случај не учествувал во вакви монструозни работи, затоа што е човек со морален интегритет и затоа што нема никаква врска со овие убиства, туку сам по себе е жртва на овој систем, на оваа буквална монтировка, на која ќе ѝ дојде крајот со изрекувањето на пресудата, дополни адвокатот.
Според него, правецот по кој што е водена истрагата за овие кривично правни настани е целосно погрешен.
-Погрешна е и намерата да се осудат овие луѓе уште на самиот старт на процесот, со примена на мерки кои не се карактеристични за овој политички систем — мерки кои не можат во ниту еден случај да ја утврдат вистината за случувањата, рече Манев.
Тој ја нагласи единствената поврзаност на Видевски со останатите обвинет, а тоа, како што кажа, е заедничкото членство во политичката партија ДЕСНА и неговата политичка активност преку таа политичка партија. Во својот говор, Манев го опиша Видевски како „татко на две деца, бил тренер по карате и многу деца изнел на вистинскиот пат“. Манев ја нападна и валидноста на признанијата, за кои рече дека се изнудени.
-Сите признанија се изнудени, на идентични текстови на записниците, што значи дека записниците се однапред подготвени. Зошто е ова направено? Само затоа што во тој момент полицијата и обвинителството сѐ уште немаат ништо, рече тој, дополнувајќи дека од моментот кога признанието е изнудено, полицијата продолжува со тортурата која трае физички.
Забележа на тоа што обвинителството не го пријавило доказот за присуство на работа на обвинетиот Видевски во критичните моменти и направи детална анализа на обвинението и доказната постапка, според која, како што рече, не постојат докази кои го потврдуваат учеството на Видевски во настаните , а исказите на останатите обвинети рече дека не можат да бидат третирани како докази поради нивната конфузност.
Според Манев, пак, обвинувањето против Александар Ѓорчевски е целосно неосновано и несериозно, при што неговото поврзување со случајот се смета за најнеприфатлива грешка направена од страна на полицијата и поддржана од обвинителството. Се истакнува дека и без правно образование е очигледно оти тој нема никаква поврзаност со делото, освен што трагедијата несреќно го вклучила во контекстот.
Претходно, адвокатот Горан Бошевски, бранител на обвинетиот Велибор Манев, во својот завршен побара ослободителна пресуда за неговиот клиент во однос на кривичното дело убиство, а осудителна за делото грабнување. Според адвокатот, не постоел договор за убиства и оттаму нема умисла за извршување таков вид кривични дела.
Судењето продолжи со завршен збор на адвокатот Владимир Туфегџиќ, бранител на Александар Ѓорчевски.
По што преостанува само завршниот збор на одбраната на Љупчо Палевски.
На изминатото рочиште Основното јавно обвинителство во завршните зборови побара максимална казна доживотен затвор за четворицата обвинети Љупчо Палевски, Влатко Кешишев, Боре Видевски и Велибор Манев, додека, за таткото на Вања, обвинетиот Александар Ѓорчевски, побара судот да му ја одреди соодветната затворска казна.
Во обвинението стои дека Палевски, Видевски, Манев, Кешишов и Ѓорчевски заедно испланирале грабнување на 14-годишната Вања со цел да присилат член на нејзиното потесно семејство да даде пари за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде неговото возило „ситроен“ за да го користат за грабнување на детето во Скопје.
Обвинетите на почетокот од судењето изјавија дека не се чувствуваат виновни, а првообвинетиот Палевски низ процесот тврдеше дека ова е политички монтиран процес.
Малолетната Вања и велешанецот Панче беа пријавени за исчезнати на 27 и 24 ноември, а на 3 декември 2023 година беа пронајдени мртви во близина на Скопје и Велес.