Со меѓународна работилница на која ќе учествуваат над 60 микробиолози од Македонија, Босна и Херцеговина, Црна Гора, Албанија, Косово, Србија и Бугарија од денеска до недела на Медицинскиот факултет во Скопје ќе се одбележи Европски ден за рационална употреба на антибиотици.
Преку теоретски и практичен дел учесниците ќе имаат можност во лабораториите на Институтот за јавно здравје и Институтот за микробиологија и паразитологија при Медицинскиот факултет, Скопје да работат на детекција на мултирезистентни бактерии, како и на механизмите на појава на резистенцијата. Со оваа меѓународна работилница се отвораат вратите на македонските лаборатории и клиники за учество во меѓународни истражувања за нови антибиотици.
Република Македонија седма година го одбележува Европскиот ден за рационална употреба на антибиотиците (ЕААД) на различен начин и преку настани насочени кон општата и стручната јавност.