Со повеќе манифестации денеска во Прилеп е одбележана 100-годишнината од раѓањето на народниот херој „Кире Гаврилоски-Јане.
Во спомен на херојот делегации на локалната самоуправа, на Сојузот на борците и на прилепското основно училиште што го носи неговото име беа положени свежи цвеќиња пред бистата на Гаврилоски во Алејата на народните херои во Паркот на револуцијата и пред спомен обележјето во Прилеп на местото каде се наоѓала куќата во која на 9 мај 1944 година, опколен од фашистичкиот окупатор заедно со Круме Волнароски загинале.
Пред спомен обележјето Учениците од училиштето „Кире Гаврилоски-Јане“ одржаа пригодна програма, а историчарот Рубин Белчески одржа историски час за животот и делото на Гаврилоски.
– Денеска одбележуваме 100-годишнина од раѓањето на еден од 10-те народни херои што ги дал Прилеп, а загинале во НОБ. Гаврилоски бил посветен на народноослободителното движење, многу активен. Пред 9 мај 1944 година ги подготвувал делегатите за заседанието. Во куќата каде се наоѓале Гаврилоски и Волнароски биле поткажани од соседите. Иако знаеле два часа претходно, до ден денес е нејасно зошто останале за потоа да бидат опколени. Волнароски бил убиен кога се обидел да избега, а го штител Кире Гаврилоски кој загинува, се смета дека се самоубил, во куќата за жив да не го фатат, објаснува историчарот Белчески.
Според прилепскиот гардоначалник Илија Јованоски, народниот херој Гаврилоски е пример како се сака и се брани татковината.
– Гаврилоски со своето херојско дело покажа како се сака и се брани татковината. Остави аманет на идните генерации како се почитуваат општеството и државата. И јас им упатувам аманет на новите генерации за сопствено надградување и покажување резултати и успеси во животот, битни за целото наше општество, рече Јованоски.
Во училиштето „Кире Гаврилоски-Јане“, градоначалникот Јованоски му додели ваучер од 10 000 денари на најдобриот ученик Благојче Павлески.
Вечер во чест на 100-годишнината од раѓањето на народниот херој во Градската библиотека „Борка Талески“ ќе се одржи вечер посветена на народниот херој.