Со пригодна средба СВР – Охрид денеска го одбележа 9 Декември – Денот на превенцијата и превентивното полициско работење. Оваа година навршуваат десет години од оформувањето на Одделението за превенција при СВР – Охрид како активност насочена кон превентивната работа на полицијата и на нејзината транспарентност.
Во основата на превентивното работење лежи потребата од дијалог на полициските службеници и граѓаните, со цел лоцирање и идентификување на безбедносните проблеми во локалната заедница и изградба на заеднички (тимски) ефикасен систем за заштита од криминалот. Истовремено, тоа е обид за градење на партнерство со граѓаните во решавањето на локалните безбедносни проблеми и изнаоѓање најдобри решенија со кои би се намалила стапката на криминалитетот, би се спречувале штетните последици по граѓаните и општеството, а воедно во насока на подобрување на целокупната безбедносна состојба.
Концептот на превентивната полициска работа претпочита спроведување на законите врз база на проекти и програми за соработка на полицијата со граѓаните и нивна практична имплементација.
Во своето проактивно полициско работење, СВР – Охрид во соработка со Министерството за внатрешни работи на Република Македонија, Мисијата на ОБСЕ, со локалните самоуправи и со низа други институции на локално ниво, реализира повеќе проектни активности, како „Соседска патрола“, „На кафе кај соседите“, „Нови згради нови жители“, „Бизнисот и безбедноста“, „За спортот заедно“, „Полицијата и граѓаните заедно“, „Почитувај ја различноста, Да ги заштитиме децата во соообраќајот“, „Превенција од дрога, алкохол и цигари“„, Безбедни матурски и полуматурски вечери“, „Безбедни училишта“, „Стоп на насилството“, „Превенција од кражби на плажа, од моторни возила, на паричници“, “Безбедност на вода и други.
Началникот на СВР – Охрид, Сашо Смилески на градоначалниците на општините Охрид и Дебарца, Јован Стојаноски и Зоран Ногачески, како и на претставниците на образовните центри и на други партнери при спроведувањето на превентивните кампањи, им додели благодарници за успешната соработка.