Општина Чешиново-Облешево како дел од мрежата на европски села на штркови, денеска со поголем број активности го одбележа „Денот на штркот“.
По потпишаниот договор со германската фондација „Еуронатура“ ќе се финансира проектот „Влажни ливади и пасишта“, преку кој ќе се пристапи кон изградба на две набљудувачници кои ќе бидат изработени од дрвена конструкција. Тие ќе бидат поставени во близина на село Уларци и во паркот во Чешиново.
– Во рамките на манифестацијата „Ден на штркот“ во населеното место Чешиново се одржа пригодна програма со учество на ученици од подрачните училишта во селата Уларци, Чешиново и Облешево. Притоа беа доделени и награди на ученици од наградниот конкурс посветен за штркот, изјави Катерина Постолова, од општина Чешиново-Облешево.
На денешното одбележување на Денот на штркот беа соопштени и резултатите од последното броење на штрковите во оваа општина. Според нив броењето и набљудувањето на штрковите и штрковите гнезда е извршено во населените места Чешиново и Облешево. Во Чешиново се евидентирани 23 штркови гнезда со 46 штрка, додека во Облешево штрковите гнезда се 34, а во нив се регистрирани 68 штрка.