Агенцијата за катастар на недвижности од утре почнува со акцијата „Отворено со катастарот”, чија цел е граѓаните кои имаат прашања и проблеми да им се овозможи да ги решат веднаш, на самото место, да се запознаат со спроведените реформи и новини, но и да дадат сугестии, предлози и идеи за подобрување на работата на катастарската служба.
Во рамки на акцијата, вратите на Агенцијата и нејзините 30 подрачни одделенија низ државата ќе бидат отворени секој ден од 9 до 17 часот. Отворените денови со катастарот почнуваат утре од градот Скопје каде акцијата ќе трае до 28 ноември. Распоредот за останатите денови на „Отворено со катастарот” е веќе поставен на веб страницата на Катастарот и во седиштата на сите општини.
Билансот на Катастарот во моментов е 107.000 запишани граѓани, со добиен имотен лист, а вкупната бројка на поднесени барања достигна 360.000. Од минатата недела почна и дистрибуцијата на направените елаборати, вкупно 603, за социјалните случаи кои имаат доставено вкупно 1.256 барања за легализација.
Постапката за легализација се уште не ја завршиле голем број граѓани, а како еден од главните проблеми и натаму е изработката на геодетски елаборати. Рокот за поднесување елаборат истекува на 31 декември 2015 година.
Акцијата „Отворено со катастарот“ започна во 2007 година и се спроведува седма година по ред.