Министерството за здравство во соработка со Здравствен дом Скопје и Институтот за белодробни заболувања од утре ќе почне со бесплатни превентивни прегледи на населението во целата држава.
Посебен акцент ќе биде ставен на населението од руралните средини.
-Прегледите ќе се вршат во специјално подготвено возило што ќе биде поставено во 52 рурални општини од кои 4 во скопско, изјави на денешната прес – конференција министерот Тодоров.
Интерес кај населението постои. Тоа го покажува искуството од минатата година, кога помош од овие пункови побарале повеќе од 15.000 граѓани.
Јованка Костовска од Секторот за превентивна здравствена заштита, пак, посочи дека населението е заинтересирано за ваквите прегледи, бидејќи луѓето лесно добиваат резултати од нив, но и информации за тоа како да се грижат за нивното здравје.
– Со овие прегледи ќе се откријат и ризик факторите за кардиоваскуларни заболувања. Резултатите од овие испитувања ќе бидат запишувани во посебни образци кои потоа ќе бидат анализирани. Позитивните наоди ќе бидат упатувани кај матичен лекар за дополнителни испитувања, рече Костовска.
Според трите институции кои меѓусебно соработуваат, ваквите превентивни прегледи му се повеќе од потребни на населението.