По објавите на социјалните мрежи и во медиумите, Основното јавно обвинителство Струмица вчера, по допрен глас оформи предмет за настанот во центарот на Струмица, кога повеќе лица беа учесници на тепачка, информираат од Обвинителството.
„Издадени се насоки и наредби до надлежните органи за доставување на податоци и утврдување на идентитетот на лицата кои беа учесници во настанот.
Обвинителството продолжува во континуитет да презема дејствија во насока на расчистување на настанот,“ се вели во соопштението.
Снимката од тепачката која беше објавена вчера, на која се гледа како група брка човек и го претепува на улица, предизвика многу реакции во јавноста, а на социјалните мрежи се појавија повеќе верзии за причините и околностите под кои се случи бруталната пресметка во центарот на градот.