Основното јавно обвинителство донесе Наредба за спроведување истражна постапка против двете лица за кои постои основано сомнение дека извршиле дејствија на кривично дело – Грабнување од член 141 став 1 во врска со член 22 од Кривичниот законик.
Тие на 3 март заедно учествувале во грабнување на внукот на сопругата на Љубе Бошкоски, во Кисела Вода. Осомничените, на возраст од 30 и 25 години, претходно по предлог на Обвинителството, а со решение на Судот беа задржани во краткотраен притвор во траење од два пати по 48 часа со цел обезбедување докази.
Бидејќи постојат околности што укажуваат на опасност од бегство, особени околности кои го оправдуваат стравот дека осомничените ќе се обидат да ги сокријат или уништат трагите на кривичното дело, ќе влијаат врз сведоците или ќе го повторат делото, јавниот обвинител до судијата на претходна постапка од Основниот кривичен суд Скопје сега достави предлог за определување мерка притвор за двајцата осомничени.
Двајцата беа уапсени на 8 март поради сомнение за нивна инволвираност во случајот во врска со киднапирањето на Самоил Костадиновски, внук на сопругата на Љубе Бошкоски.
Самоил Костадиновски за исчезнат беше пријавен од неговиот брат.