Основното јавно обвинителство за гонење на организиран криминал и корупција денеска го сослуша осомничениот судија, на кого му беа презентирани сите досега прибрани докази што го поткрепуваат основаното сомневање за сторени кривични дела.
По сослушувањето и по извршената проценка на околностите релевантни за обезбедување на неговото присуство во постапката, јавниот обвинител до судијата на претходна постапка при Основниот кривичен суд Скопје достави предлог за определување мерка куќен притвор.
Покрај куќниот притвор, Обвинителството предложи и мерка на претпазливост, со која се бара привремено одземање на патната или друга исправа за преминување на државната граница, како и забрана за издавање нов документ од тој вид.
Од Јавното обвинителство наведуваат дека предложените мерки се неопходни за непречено водење на истрагата, имајќи ја предвид сериозноста на делата и фазата во која се наоѓа постапката. Конечната одлука по предлогот треба да ја донесе судијата на претходна постапка.
Судијата се сомничи за противправно стекнување и прикривање имот. За време на претрес извршен по судска наредба во домот на неговите родители во Неготино, беа пронајдени 350.000 евра скриени во соѕидан простор во ѕид. Според Обвинителството, постои основано сомневање дека станува збор за незаконски стекнати средства.
Случајот е дел од поширока истрага за висока корупција, која, како што информираат од обвинителството, е поткрепена со информации од Агенцијата за национална безбедност.
Инаку, осомничениот судија и натаму ужива судиски имунитет, кој може да му биде одземен од Судскиот совет, по претходно барање на судијата на претходна постапка.