Шефицата на Јавното обвинителство за гонење на организиран криминал и корупција, Вилма Русковска, за А1он вели дека обвинителството до сега нема добиено никакво известување за здравствената состојба на Јанакиески. Со оглед на тоа, обвинителството се уште не може да побара предвремено укинување на мерката притвор за ексминистерот и замена за поблага мерка на претпазливост.
На 29 јуни, Јанакиески заедно со уште седуммина осомничени за нелегална продажба на државно земјиште доби 30 дневен притвор. Поранешниот министер речиси 2 недели ја одбива затворската храна поради што, како што велат неговите адвокати, од ден во ден му се влошува здравствената состојба.
Пред неколку дена Јанакиески се пожалил на гадење и болки во бубрезите по што веднаш бил пренесен во ГОБ „8 септември“. Откако му била дадена соодветна терапија вратен е во затворот во Шуто Оризари.
Ексминистерот за транспорт и врски неколку пати до сега беше пуштан од притвор од повеќе причини меѓу кои и физичката пресметка со притворениците од „Диво Насеље“.
