Надлежен јавен обвинител од Основното јавно обвинителство Скопје поднесе обвинение против едно лице за сторени кривични дела телесна повреда и противправно лишување од слобода.
Како што соопшти Јавното обвинителство, обвинетиот државјанин на Босна и Херцеговина, при вршење семејно насилство телесно ја повредил и противправно ја држел затворена оштетената со која живеел во вонбрачна заедница во Кралството Шведска.
Обвинетиот и оштетената во мај 2019 година дошле во Република Северна Македонија за да склучат брак. Зеле под закуп стан во Скопје во кој обвинетиот, вечерта на 23 мај во 23:00 часот, ја заклучил оштетената по што го фрлил клучот и го одзел мобилните телефони за жртвата да не може да бара помош. Потоа започнал да ја удира и турка оштетената. Поради дејствијата на обвинетиот кои траеле до 5:30 часот изутрината, оштетената се здобила со видливи повреди по телото.
Заедно со обвинението, јавниот обвинител до скопскиот Кривичен суд достави и предлог за продолжување на мерката притвор, која беше определена од страна на судија на претходна постапка на 25 мај 2019 година.