Зајакнување на капацитетот на македонската дипломатско-конзуларна служба од аспект на безбедноста е целта на обуката што во организација на Дипломатската академија при МНР се одржа за службеници на ова Министерство.
Обуката за откривање на фалсификувани документи е спроведена во соработка со Бирото за јавна безбедност при Министерството за внатрешни работи. Развиена е од страна на МВР во соработка со Европската агенција за обезбедување на надворешните граници на земјите членки на Европската унија (FRONTEX).
Со обуката беа опфатени теми како: основни техники и начини на откривање фалсификувани документи, видови фалсификувани документи, видови заштита како и системи, односно начини на издавање документите, нивоа на заштита и безбедносни карактеристики на документите.