Собранието денеска го објави огласот за нов јавен обвинител на Македонија со што почнува да тече рокот од 15 дена за поднесување на кандидатури до Советот за јавни обвинители.
Потенцијалниот обвинител треба да исполнува неколку норми, да биде дипломиран правник и граѓанин на Македонија, да има положено правосуден испит како и да има работно искуство од најмалку осум години со потврдени резултати на правни работи.
Кандидатот може да биде и универзитетски професор кој предавал повеќе од десет години некој предмет кој има поврзаност со правото.
Досега, кандидатури за јавен обвинител најавија нотарката Лорија Ваневска и адвокатите Звонко Давидовиќ, Александар Тортевски, Александар Наков и Сејфула Османи.
Доколку Советот не даде позитивно мислење за ниту еден од пријавените кандидати или Владата не може да избере, по предлог до Собранието ќе се распише нов оглас.