Обезбедувачите на експретседателот на државата, Ѓорге Иванов, кои денеска дојдоа на работа во кабинетот на претседателот Стево Пендаровски, добиле два слободни дена, дознава „А1он“. Кога изутринава тие дошле на работа во претседателската вила на Водно, а по телеграмата на министерот Наќе Чулев за укинување на наредбите од Оливер Спасовски, ним им било кажано да одмораат додека да се реши што ќе се прави понатаму. Тоа било најгалантно и најбрзо решение со оглед дека ситуацијата не била предвидена.
Образложението им било дадено од вработен во кабинетот на Пендаровски објаснуваќи им дека за нивниот работен ангажман ќе се решава на највиско ниво. Тие, пак, очекуваат до четврток да се реши спорното прашање и да им се дадат работни задачи во кабинетот, каде што се вработени според решенијата што ги имаат.
Портпаролката Билјана Радева од кабинетот на Пендаровски и натаму тврди дека не постојат измени во ресурсите и бројноста на професионални лица од МВР ангажирани за обезбедување на претседателот.
Но, во кабинетот остануваат обезбедувачите што Пендаровски ги доби со стапување на функцијата, а лицата што го обезбедувале експретседателот Иванов добиле само слободни денови, што значи дека сè додека не се донесе нова одлука од МВР, тие ќе бидат дополнително обезбедување на претседателот. Ангажманот на овие полицајци е во согласност со решенијата за работа што ги имаат од МВР.
„Станува збор за неколку лица, точната бројка е информација од доверлив карактер и не би можеле да ја објавиме“, одговори Радева за „А1он“ по инсистирањето да каже дали и колку лица дошле денес на работа во кабинетот.
Паника во МВР има и за испразнетите работни места во секторите каде што полицајците работеле со наредба, со оглед дека таму и претходно имало недостиг на кадар.