Министерството за здравство воведува протоколи за работа во Итната медицинска помош кои се однесуваат на интервенциите кои се од витално значење во работењето на тимовите. Со овие стандарди ќе се олесни работата на тимовите и однапред ќе се предвидуваат начините на интервенција.
„Изработени се протоколи за третирање итни случаи во областа на кардиологија (асистолија, тахикардија, брадикардија, миокарден инфаркт, акутна срцева слабост), протоколи од областа на каков било вид траума со начин на имобилизација според стандарди, за невролошки случаи посебно мозочен удар, за итни случаи причинети од средината (студ, топлина), за труења и предозирања“, рече Тодоров.
Форматот на протоколот како алатка ќе биде во печатена верзија која ќе ја поседува секој вработен во Итната медицинска помош, но исто така ќе ја има и во верзија за користење таблет компјутери кои ќе бидат достапни во секое возило на Итната медицинска служба.
Таблет верзијата овозможува брзо пребарување и користење на содржината на протоколот за итна медицинска помош, како и останатите упатства за практицирање медицина базирана на докази.