Министерството за здравство информира дека во изминатите 24 часа се регистрирани 22 нови случаи на коронавирус во земјата. Петнаесет случаи се во Скопје, четири во Дебар, два во Куманово и еден во Охрид.
Со ова, вкупната бројка на дијагностицирани пациенти со КОВИД-19 денеска до пладне, изнесува 136, од кои еден е излекуван и двајца починати пациенти.
Ноќеска на Клиниката за инфективни болести и фебрилни состојби во Скопје почина еден пациент заболен од коронавирус. Станува збор за маж на 63-годишна возраст од Дебар, кај кого дошло до нагло влошување на состојбата.
Како што информира Министерството за здравство, пациентот бил хоспитализиран на Клиниката за инфективни болести и фебрилни состојби на 17 март, без покачена температура, но со наод на белите дробови и бил зависен од кислород.
– Во текот на ноќта нагло се влошува неговата состојба, веднаш е интубиран, ставен на респираторна машина, но во неколку часа неговата состојба дополнително се влошила и пациентот починал. Пациентот немал позната историја на коморбидитет, се вели во соопштението на Министерството за здравство.
Завчера вечерта, од коронавирусот почина и 57-годишна жена од Куманово, кај која двата тестови претходно се покажале негативни на Ковид-19, а посмртно тестот бил позитивен.