Носителот на листа од Коалцијата предводена од СДСМ за Куманово, Атина Мургашанска и кандидатите за советници, денеска одржаа прес-конференција во центарот на Куманово, каде што презентираа дел од мерките опфатени во програмата за локалните избори.
– Во нашиот план за живот за Куманово планираме повеќе пари за општината, а со тоа и повеќе можности за сите. Ќе вложиме во младите и ќе отвориме центри за отпочнување на развој на бизнисите. Ќе направиме здружување на бизнис заедницата, општината и граѓаните со единствена цел нови и подобро платени работни места, рече Мургашанска.
Таа додаде дека ќе ја вклучат бизнис заедницата во дефинирањето на приоритетите на општината и ќе воведат бизнис форуми како редовна активност за проектирање и следење на локалниот економски развој
– Планираме подобрување и создавање услови за развој, инвестирање во индустриската зона, утврдена со урбанистичкиот план во населено место во месноста Речица и Новине преку изработка на проектна документација и реализација на инфраструктурата која ќе овозможи квалитетен пристап и промоција кај потенцијалните инвеститори, изјави Мургашанска.
Со тоа, рече, ќе се создадат услови за создавање нови работни места, а потенцијалните инвеститори ќе имаат подобри услови.
– Ќе воведеме мерки со кои општината ќе и овозможи на бизнис заедницата да го зголеми капацитетот на вработувањето и нови мерки со кои младите ќе започнат свој сопствен бизнис, додаде Мургашанска.