Поради силниот ветер, пожарот од Светиниколско, брзо се прошири накај штипскиот дел, информираше вечерва на социјалните мрежи градоначалникот на Штип, Сашко Николов.
Пожарот беснее кај Кадрифаково, Криви Дол и Доброшани.
„Сакам да ги известам граѓаните дека навремено се мобилизиравме и сложно се организиравме сите, со цел да спречиме ширење на пожарот! На терен веќе се противпожарните екипи од Штип и од Свети Николе и заедно со припадници на Армијата и полицијата се борат со пламените јазици. Сите заедно сме на Пожнозе, заедно со група граѓани ги помагаме за побрзо локализирање на пожарот“, вели Николов.
Обезбедени се цистерни со вода како и багери од ЈП Стипион и ЈП Исар.
„Апелирам до граѓаните да останат смирени и да ги следат насоките од надлежните институции. Во моментов преземаме се’ пожарот да не се прошири и целосно да се изгасне“, пишува градоначалникот на Штип.