Македонија и Косово немаат отворени прашања, и затоа се отвораат нови иницијативи со кои ќе се подобрува економската соработка помеѓу двете земји, рекоа шефовите на македонската и косовската дипломатија, Никола Попоски и Енвер Хоџај.
„Помеѓу Македонија и Косово нема отворени прашања и поради тоа на денешната средба отворивме низа иницијативи со кои ќе ја подобруваме економската соработка помеѓу двете земји“, изјави Никола Попоски, министерот за надворешни работи по средбата со неговиот косовски колега.
Шефот на косовската дипломатија, Енвер Хоџај изјави дека Македонија за Косово претставува важен политички и стратешки партнер и двете земји делат еднакви цели, а тоа е заедничка европска иднина.
Коментирајќи го петкратното убиство кај Смиљковското езеро, Хоџај појасни дека македонското и косовското министерство за внатрешни работи се во постојан контакт во врска со случајот. Тој додаде дека токму поради таквата соработка, ваквите проблеми не ја отежнуваат комуникацијата меѓу Скопје и Приштина.