Лажна е пријавата за наводно исчезнато дете од Клинички центар, информираат од МВР.
Во текот на вчерашниот ден информација дека исчезнало бебе од клиничкиот центар ја разбранува јавноста. Неколку институции се мобилизираа и ја проверуваа информацијата. Но по сите проверки и во клиничкиот центар но и од страна на МВР е заклучено дека се работи за лажна пријава и пријавителката е лишена од слобода.
„ Министерството за внатрешни работи ја известува јавноста дека во координација со ОЈО Скопје го расчисти случајот со наводно исчезнато дете на Клинички центар и утврдено е дека станува збор за лажна пријава од страна на Л.А..Веднаш по добиената пријава, од страна на Единицата за насилен криминал при СВР-Скопје, а во консултација со ОЈО Скопје преземени се соодветни мерки и активности. “, велат од МВР
Додаваат дека се направени и детални проверки во системот на Гинеколошко акушерска клиника Скопје за примени пациенти, и притоа констатирано е дека Л А. последен пат е хоспитализирана во 2019 година.
Исто така направени се проверки во системот на Детска клиника и притоа не е забележано новородено дете како што пријави Л.А..
Направени се проверки во ординацијата на матичниот лекар на Л.А. и притоа констатирано е дека таа била на преглед на 08.03.2023 година каде што од страна на докторот е констатирано дека Л.А. не е трудна.
Извршен е разговор со докторот и од прибраните докази е констатирано дека пријавата на Л.А. е лажна.
Во консултација со дежурен јавен обвинител Л.А. е лишена од слобода и задржана во полициска станица за понатамошно постапување.