Директорот на М-НАВ, Фахрудин Хамиди нападот врз вработени во М-НАВ за што полицијата веќе повика повеќемина на распит го гледа како конфликт помеѓу колеги кои се знаат повеќе години и кои заедно биле на тестирање пред да почнат да работат.
„Има две рампи, има и трета и четврта и петта. Не можам да навлезам во тоа. Се случил немил настан, дефинитивно. Се работи за конфликт помеѓу колеги, се знаат 20 години, заедно биле на тестирање“, рече Хамиди.
Тој негира дека се видел со Беким Незири, кој ги внел другите напаѓачи во М-НАВ, иако двајцата се кадри на владејачката ДУИ.
Во меѓувреме, за овој настан, обвинителството чека кривични пријави од Министерството за внатрешни работи, кое се уште повикува инволвирани лица на информативни разговори.