Претставници на ЈП „Национален парк – Галичица“ денеска остварија работна средба со раководни лица на Територијалната противпожарна единица од Охрид, насочена кон превенција на пожари, особено во престојниот временски период кога временските услови и покачените температури придонесуваат за поголема опасност од такви елементарни појави.
Како што истакна Наум Новески од Националниот парк – Галичица, службите на паркот изминатите денови регистрирале зачестени појави на палење стрништа во рамки на подготовките на земјоделците за пролетната сеидба, што претставува опасност од појава и неконтролирано ширење на пожари.
– Благодарение на брза интервенција на противпожарната служба спречени се пожари, но обврска ни е преземање активности за спречување на такви појави и информирање на населението за последиците од несовесно однесување, како предизвикување големи материјални штети, така и за казните предвидени со закон, истакна Новески.
Командирот на Противпожарната единица Спасе Прентоски истакна дека иако споредбено првото тромесечие оваа година бројот интервенции е далеку помал отколку истиот период во 2012, ваквите средби секако помагаат за подобрување на соработката за оперативно и тактичко делување за поголема ефикасност на заштитата на шумските и отворените простори на територијата што е под нивна надлежност.
На средбата беше истакната добрата соработка на противпожарната единица и на Националниот парк со месните заедници и населението што гравитира во рамки на паркот, но е упатен апел до граѓаните за одговорно однесување во насока на заштита на шумите како природно богатство и на природните реткости што се дел од Националниот парк.
