Околу 1.600 завршени средношколци сакаат да студираат на универзитетот „Гоце Делчев“ во Штип, покажуваат бројките од првиот уписен рок за запишување ан студенти во прва година за академската 2018-2019 година.
Проректорот на Универзитетот „Гоце Делчев“ Штип, Кирил Барбареев на денешната прес-конференциај информира дека во рамките на оваа бројка се и пријавените 120 странските студенти од Турција, Србија и Бугарија. Забележува дека се пополнети квотите за општа медицина и на студиската програма за медицински сестри, каде што има голем интерес.
– Во моментов ќе се консултираат студентите за нивната втора и трета опција, која што во текот на денешниот и утрешниот ден ќе можат да се видат и на тие места. Се очекува и во вториот уписен рок да има голем интерес на Факултетот за медицински науки, бидејќи се очекува и еден поголем дел на студенти од Медицинскиот факултет во Скопје, кои ќе конкурираат на некои од слободните места на некои од студиските програми, вели Барбареев.
Тој истакна дека се добри и бројките на Факултите за информатика, филолошкиот, економскиот, правниот.
– Генерално постои некој баланас меѓу општествените и хуманистичките науки и меѓу техничките и природните науки. Интересот кога ќе се соберат сите бројки може да се каже дека сите факултети и центри на универзитетот ќе имаат пристојна бројка, соодветна за нормална работа и функционирање на факултетите, рече Барбареев.
Идните студенти, кои се примени во првиот уписен рок можат да се запишат на факултетите и академиите на штипскиот универзитет на 12 и 13 септември, а веќе од 14 до 17 септември ќе биде и вториот уписен рок на оние факултети, каде што иам слободни места за одредени студиски програми. Штипскиот универзитет веќе се подготвува и за првиот академски час, кој оваа година е на 1 октомври.