Основниот суд Скопје 1, Скопје по барање на Специјалното јавно обвинителство денеска одлучи на обвинетиот Никола Груевски, кој моментално се наоѓа во Унгарија, да му се суди во отсуство.
– Имајќи го во предвид известувањето од МВР дека обвинетиот Никола Груевски не е достапен на органите за прогон, постојат важни причини на обвинетиот да му се суди во отсуство. Во случајот „Насилство во Центар“ се работи за обвинителен акт поднесен пред повеќе години за дејствија преземени во 2013 година и во текот на расправата треба да бидат испрашани повеќе сведоци. Не е извесно кога обвинетиот Никола Груевски ќе биде достапен да му се суди во присуство и за тоа бараме да му се суди во отсуство, рече обвинителката Фатиме Фетаи.
Адвокатот на експремиерот Никола Груевски, Димитар Дангов рече дека ова барање на обвинителството е неосновано и побара наместо судење во отсуство за Никола Груевски, во овој случај, да биде раздвоена постапката. Ова барање на адвокатот Дангов беше одбиено од страна на судот.
– Со раздвојување на постапката ќе се овозможи на сообвинетите да им се повреди правото на судење во разумен рок. Никола Груевски е достапен за органите на прогонот. Нашето МВР по налог на судот, во контакт со министерството за внатрешни работа на Унгарија, може да направи обид за негов повик со цел да биде достапен во оваа постапка. Од известување, неспорно е дека Никола Груевски се наоѓа во Унгарија, каде што е соопштено дека истиот бара политички азил. Ако за министерството за внатрешни работи на Унгарија е позната адресата на Никола Груевски, позната е и за нашите институции, рече Дангов.
По известувањето на адвокатот Димитар Дангов, обвинителот од СЈО, Гаврил Бубевски, повтори дека условите за судење во отсуство на Никола Груевски се исполнети, односно дека причините кои се наведени за раздвојување на постапката не постојат, затоа што кај обвинетиот му се ставаат на товар соучеснички дејствија во кривично дело и затоа бара иста постапка со извршителите.
Виктор Јованов