Сите инсулини што се користат во Република Македонија се од врвните светски производители и тие се во употреба во најразвиените здравствени системи во светот. Испораката на инсулини во аптеките се врши согласно препишувањата од докторите-специјалисти и целосно во согласност со Законот за здравствена заштита, како и упатствата и протоколите од оваа област, се вели во писмената реакција на Министерството за здравство на прес-конференцијата на пратеничката од СДСМ Јагода Шахпаска.
Во неа се додава дека пратеничката и СДСМ се обидуваат да креираат паника меѓу лицата со дијабетес, да создадат комплетно лажна слика за состојбата со инсулинска терапија во државата, притоа злоупотребувајќи ја, како што се посочува, оваа чувствителна група на пациенти.
– Комплетна невистина е констатацијата дека во Македонија кога било имало инсулинска криза. Количините на инсулин во сите инсулински аптеки во државата, во целост одговараат со потребите на пациентите со дијабетес мелитус за кои е потребна инсулинска терапија. Веројатно СДСМ поттикнати од сознанието како во нивно време се спроведувале тендерите за набавка на инсулини, сега непотребно шират паника и страв меѓу лицата со дијабетес, се вели во реакцијата од Министерството за здравство.
Оттаму бараат пратеничката Шахпаска да одговори дали фармацевтските компании ја финансираат оваа, како што посочуваат, негативна кампања и хајка која се води против Министерството, а на грбот на една чувствителна група пациенти – лицата со дијабетес.