Министерството за здравство денеска апелира до граѓаните да ги почитуваат во целост мерките и препораките за заштита од коронавирусот.
Почитувањето на мерките ќе овозможат побрз излез од здравствената криза, потенцираат од Министерството, повикувајќи ги граѓаните да се воздржат од групирање и да ја одржуваат потребната дистанца.
-Да носиме заштитна опрема и да ги миеме често и да ги дезинфицираме рацете. Да бидеме внимателни и да го заштитиме личното, но и колективното здравје, порачуваат од МЗ.
Потсетуваат дека на вчерашната прес-конференција, министерот за здравство Венко Филипче потенцираше сите граѓани да даваат вистинити и точни информации на надлежните институции, а МВР поинтензивно да врши контроли на терен.
-Сите мора да се придржуваат, без исклучок до препораките и целосно и вистинито да ги даваат сите информации до надлежните. Со криење и со давање невистинити податоци не се постигнува ништо, ниту некој ќе се заштити од болеста, напротив и себеси и најблиските така се доведуваат во голема опасност. Апелирам уште еднаш до МВР поинтензивно да се вршат контроли на терен, рече Филипче.