Муцунски: Прерано е да се дискутира за прием на Украина во НАТО

Од:

Нашата држава има позитивен пристап кон политиката на отворени врати на НАТО за прием на нови членки, но засега е рано да се дискутира за членство на Украина во Алијансата, изјави министерот за надворешни работи и надворешна трговија Тимчо Муцунски во врска со иницијативата на Киев за зачленување на Украина во НАТО по забрзана постапка.

– Ние како држава генерално имаме позитивен пристап кон принципот на отворени врати, но тоа е одлука што се носи со консензус и за која треба да има подетална дискусија помеѓу земјите членки. Прерано е да се дискутира за такво нешто, нагласи Муцунски, кој престојува во Брисел, каде денеска и утре учествува на состанокот на министрите за надворешни работи на НАТО.

Украина е главна тема на заседанието на Советот НАТО-Украина во форма на работна вечера во рамки на министерскиот состанок, на кој учествуваат и шефот на украинската дипломатија Андриј Сибиха и новата висока претставничка на ЕУ за надворешни работи и безбедносна политика Каја Калас.

Како што најави Муцунски, министрите на членките на НАТО со Сибиха и Калас ќе разговараат за најновите случувања поврзани со руската агресија врз Украина, чекорите што ги презема Алијансата за помош на земјата, како и за позициите на сојузниците поврзани со имплементацијата на заклучоците од јулскиот Самит на Пактот во Вашингтон.

Министерскиот состанок започна со заседание на Северноатлантскиот совет на ниво на шефови на дипломатии посветено на тековниот конфликт на Блискиот Исток и неговото влијание врз евроатлантската безбедност, на кое учествуваше и јорданскиот крал Абдула Втори.

Според Муцунски, на средбата се разговарало за сериозните предизвици од политичка и безбедносна гледна точка поврзани со случувањата на Блискиот Исток, кои влијаат на глобалната стабилност и глобалниот мир.

– Во таа насока беа споделени согледувања и имаше дискусија за тоа како НАТО треба да се позиционира за овие клучни прашања во периодот што доаѓа, рече Муцунски.

Во врска со предлозите за зголемување на одвојувањата за потребите на одбраната од страна на земјите членки и над нивото од најмалку два отсто од националните БДП, Муцунски вели дека тоа е прагот што во моментов го има поставено Алијансата и кој е испочитуван од страна на нашата земја.

– Свесни сме дека постои влошена и волатилна состојба од безбедносна гледна точка на глобално ниво. Ќе работиме со сојузниците да се адаптираме кон реалноста што ја имаме, додаде Муцунски.

Би можело да ве интересира

Средба Муцунски – Спајиќ: Програмата за млади глобални лидери е симбол на колективна акција и визија

А1он

Еврокомесарката Марта Кос пристигна во Македонија

А1он

НАТО би можело да се распадне, порака од Русија

Муцунски: Софија е влезена во многу опасен наратив кој е во корист на трета страна спротивставен со интереси и на ЕУ и на НАТО

Катерина Ѓуровски

Песков: Путин и Трамп никогаш не разговарале за заканата од Русија за НАТО

Левица: Македонија ќе одвојува 5% од БДП за туѓи војни, додека народот е во борба за преживување

Катерина Ѓуровски