Нема застој во реализацијата на проектот „АРМ – мој вистински дом“, наведува Министерството за одбрана во писмената реакција на денешната изјава на претседателот на Комисијата за одбрана на СДСМ.
– Камен – темелникот беше поставен на први октомври и во моментов течат подготвителни активности, но во ниту еден случај не станува збор за застој на проектот. Во договорот со фирмата изведувач избрана во законска процедура на 7 септември оваа година постојат рокови кои се почитуваат, истакнува МО.
Оттаму посочуваат дека целата процедура се одвива согласно законот, односно кон крајот на минатата година од страна на општина Карпош е издадено Одобрение за градба, кое е правосилно. – Министерството уплати 10 од предвидените 24 рати за комуналии кон општина Карпош и кон Град Скопје. Потпишан е Договорот за долготраен закуп на земјиште на 99 години и избрана е банката која ќе биде партнер во проектот, нагласува МО во писмената реакција.