Министерството за одбрана (МО) ги повикува сите млади граѓани на Република Македонија да се пријават на објавениот оглас за професионални војници и со тоа да ја искористат можноста да бидат дел од Армијата на Република Македонија.
Како што соопшти МО, селекцијата ќе биде во рамки на максимална транспарентност која вклучува четири фази – поднесување документи, медицински прегледи, психофизички тестови и процес на специјална селекција. Целта е да се продолжи со традиционалното ангажирање на професионални војници со развиени психофизички способности и високи морални и етички стандарди.
– Уште еднаш ги повикуваме сите млади луѓе кои се убедени дека можат да ги исполнат обврските во една од најугледните институции во Република Македонија и кои сакаат да придонесат за безбедноста и заштитата на територијалниот суверенитет, да се пријават на јавниот оглас за професионални војници објавен во дневните весници на Република Македонија и на веб страницата на Министерството за одбрана, апелира МО.