Митрополитот преспанско-пелагониски и администратор австралиско-новозеландски Петар утрово во Соборниот Храм „Свeти великомаченик Димитриј“ во Битола, по повод големиот празник Рожденството Христово – Божик, одржа Божествена Василијева литургија.
Православните верници, претставници на јавниот живот во државата и градот, меѓу кои и градоначалникот Владимир Талески и заменик-министерот за земјоделство, шумарство и водостопанство Зоран Коњановски, митрополитот Петар ги поздрави со радосниот и торжествен поздрав – Христос се роди!
Според востановената традиција, на првиот Божикен ден, митрополитот на преспанско-пелагониската епархија Петар ги посети штитениците во ЈУ „Дом за доенчиња и мали деца“ во Битола на кои им го честита празникот и новата православна година.
– Господ се грижи за овие деца што ги напуштиле родителите и ќе најде други родители што ќе им овозможат поголема родителска љубов. Христос се родил и за нив, и затоа кога денес ги посетуваме овие дечиња се сеќаваме на Христовото раѓање и заедно со нив ја споделуваме заедничката радост, истакна митрополитот Петар.
На денешната средба со новинарите Петар посочи дека православна вера проповеда дека треба да се исполни Божјата заповед – раѓајте се, множете се, наполнете ја Земјата и вледејте со неа!
– Статистички е докажно дека раѓањето на децата е поприсутно кај посиромашните семејства споредено со побогатите бидејќи кај богатите семејства е нагласен егоизмот. Тоа во голема мера е заради кариери и комодитет во животот и затоа тие не раѓаат. Оние што имаат можност да родат деца, треба да родат без да се спречуваат раѓањата, истакна митрополитот преспанско-пелагониски Петар.
Празнувањето на Исусовото раѓање во кругот на секое православно семејство и во храмовите на преспанско-пелагониската епархија продолжува и во наредните денови, а утре и задутре Света Златоустова литургија митрополитот Петар ќе одржи во Храмот „Благовештение“, како и во Храмот „Св.Кирил и Методиј“ во Прилеп.