НДП синоќа одржа предизборен митинг во Чајле, Гостиварско.
– Работевме напорно и без одмор за доброто на граѓаните изминатите четири години. Ве уверувам дека така ќе биде и во наредниот мандат. Поработливи сме и поумни од нашите противници. Овие избори се шанса да им се даде црвен картон на албанските политички партии кои не сработија ништо и ја злоупотребија довербата на граѓаните, рече кандидатот за градоначалник на Гостивар Руфи Османи.
Тој побара поддршка од граѓаните на 24 март, потенцирајќи дека локална власт успеа да обезбеди значајни средства преку донации и кредити од странски фондови и банки.
– Благодарение на нашата работа, труд и транспарентност стигнавме до странските фондови и ги убедивме нашите пријатели од Турција, Италија, Германија да ни ги поддржат проектите. Прашајте ги министрите на ДУИ зошто тие не успеале да извлечат пари за општина Гостивар и зошто и Струга е пред колапс, а Врапчиште има блокирана сметка, рече Османи.
На митингот во гостиварско Чајле зборуваа и носителот на листата од НДП Африм Илјази, како и пратеничката Фламуре Демири Креци.