Субвенционирање на реконструкцијата на фасадите во општина Македонска Каменица ќе биде еден од приоритетите на кандидатот за градоначалник од ВМРО-ДПМНЕ и актуелен градоначалник на Македонска Каменица, Дарко Митевски. Тој денеска на прес-конференција истакна дека целта на овој проект е Македонска Каменица да добие поубав модерен лик.
– Земајќи ги предвид барањата и потребите на граѓаните, општина Македонска Каменица ќе субвенционира реконструкција на фасадите на колективните објекти за домување. Овој проект има повеќекратно значење. Најпрвин, значително ќе се подобри енергетската ефикасност на колективните згради, со што и граѓаните ќе заштедуваат повеќе. Освен тоа, Општината ќе добие поубав лик со што ќе се продолжи по трасираниот пат за градење модерна европска општина, истакна Митевски.
Тој додаде дека општината секогаш ги слуша идеите од граѓаните. – Ние ги прифативме овие идеи и со ова ќе покажеме дека грижата за сите граѓани, како од градското подрачје, така и од руралните делови на општината, е посветена и ќе работиме секогаш за подобра иднина на граѓаните на Македонска Каменица, рече тој.