Европскиот суд за човекови права ја избра Мирјана Лазарова Трајковска за претседател на една од петте секции на Европскиот суд за човекови права во Стразбур, јави дописникот на МИА.
Мирјана Лазарова Трајковска е судија во ЕСЧП од 1 февруари 2008 година, како судија предложена од Република Македонија.
Изборот на Лазараова Трајковска на оваа функција е признание не само за земјата која ја претставува, туку и за нејзината долгогодишна работа во рамките на судот, но и како експерт во Советот на Европа со самото членство на Република Македонија во 1995 година.
Лазарова Трајковска, родена на 5 ноември 1963 година во Струмица, претходно беше член на Венецијанската комисија, поранешен судија во Уставниот суд на Република Македонија, а беше и претседател на Државната изборна комисија во 2002-2003 година.