Ромите кои по осум месеци работа во Транзитниот прифатен центар „Винојуг“ во Гевгелија биле отпуштени, денеска повторно одржаа мирен протест пред кампот, порачувајќи дека нема да се откажат и дека остануваат во него.
– Се собравме повторно да изразиме револт и незадоволство од нашата министерка која вчера на вести не нарекуваше како ние да не постоиме, а ние овде работиме осум месеци и ја одржуваме хигиената на високо ниво, рече Гушев Филип, еден од отпуштените во кампот „Винојуг“ во Гевгелија.
Побара министерката за труд и социјална политика Фросина Ташевска Ременски да седне со нив да разговара и да се најде решение за овој проблем.
Според Гушев сега проблем се средствата, кои досега ги плаќал УНХЦР, а сега тие се префрлаат во Министерството за труд и социјална политика.
Вкупно 44 вработени во кампот „Винјуг“ веќе неколку дена протестираат, со барање како што кажаа, да добијат одговор зошто не е најдено решение за тие да бидат вратени на работа, иако станува збор за лица кои се обучени, вакцинирани и работеле во кампот од почетокот на неговото поставување. Тие, како што велат, биле најзаслужни за високото ниво на хигиената додека во него дневно минувале и по 15 илјади луѓе.