Министерството за култура најостро ги демантира, како што наведуваат оттаму, лагите и невистините кои деновиве се пласирани од страна на потпретседателот на СДСМ, Дамјан Манчевски, кој изнесувајќи неточни податоци за изградбата на Музејот на македонската борба, на тенденциозен начин се обидува да ја манипулира јавноста.
Сите склучени договори за изградбата на Музејот на македонската борба, посочуваат од Министерството за култура, беа презентирани и дадени на увид на јавноста во рамките на отчетот за проектот „Скопје 2014“. Музејот на македонската борба во изминатиот период беше посетен од страна на повеќе од 100.000 домашни и странски посетители и претставува еден од најрепрезентативните објекти во нашата земја.
– Социјал-демократскиот сојуз никогаш во своето владеење не изградил ништо, затоа нема јасна перцепција што значи да изградиш еден ваков репрезентативен објект. Жалиме што уште еднаш со изнесување на невистини, се обидувате да го девалвирате значењето на овој објект кој што на уникатен начин ја претставува македонската историја.Веруваме дека вие г. Манчевски сте го посетиле Музејот на македонската борба и имате јасна претстава за што зборувате. Но, доколку не сте биле, ние ве покануваме, заедно со кустос, да прошетате и да се запознаете со богатата македонската историја, стои во реакцијата на Министерството за култура.