Министерството за култура и Управата за заштита на културното наследство преку соопштение изразуваат жалење што по неодамнешните изјави на СДСМ со кои ги дискредитираше уметниците и нивните уметнички потенцијали, на „просечни и анонимни, квалификувајќи ги нивните проекти како изветвени“, оваа политичка партија повторно прави маркетинг и користи еден немил настан за дневно-политички цели.
Денешното соопштение за јавност на СДСМ за наводната континуирана негрижа за културното наследство, стои во реакцијата на Министерството и Управата, е тенденциозно и е без никакви аргументи во согледувањето на фактите и состојбите во македонската култура.
Фактите и аргументите за постигнатото во заштитата на културното наследство во последните шест години, како што се наведува, се видливи и мерливи.
Сериозниот однос кон културното наследство на оваа Влада и на Министерството за култура е потврден со илјадници реализирани проекти од областа на заштитата на културното наследство, за разлика од времето на СДСМ кога овој сегмент, но и останатите од областа на културата, беа ставени буквално на маргините на државната политика, а археолошките наоѓалишта беа постојана мета на дивите копачи, стои во реакцијата.
Како што информиравме и вчера, посочуваат од Министерството, надлежната институција Завод и Музеј Прилеп и Управата за заштита на културното наследство веднаш пристапија кон изработка на проект за реконструкција и санација на манастирскиот комплекс Трескавец кој ќе биде готов за еден месец.
Оттаму сметаат дека е особено важно што црквата и трпезаријата кои потекнуваат од 13 и 14 век не се уништени во овој немил настан.
– Исто така на вчерашната седница, Владата веднаш додели еднократна помош за манастирот Трескавец. Да го потсетиме СДСМ дека во моментот, во Прилеп се работи и на реконструкција на конаците во манастрирот Свето Преображение Зрзе и реконструкција на конакот во манастирскиот комплекс Варош, а во завршна фаза е и проектот за реконструкција и санација на манастирот Св. Јован Бигорски. Воедно, Министерството за транспорт и врски започна и со изградбата на патот Трескавец-Прилеп, кој долги години не беше направен, од причини познати само на СДСМ. Несериозно е трагедии како што се опожарувањето на манастирскиот комплекс Трескавец или муралот на Борко Лазески да се ставаат во дневно-политички контекст и културата и наследството да се користат како инструменти за политички пресметки, стои во реакцијата на Министерството за култура и Управата за заштита на културното наследство.