Министерот за информатичко општество и администрација Иво Ивановски попладнево во рамки на посетата на Кавадарци се сретна со раководството на ОК на ВМРО-ДПМНЕ во овој град, а го посети и интернет клубот каде заврши проектот за обука на граѓани за основни познавања за работа со компјутер.
Ивановски изрази задоволство од големиот одѕив на граѓаните за да ја следат обуката и најави дека поради големиот интерес со проектот ќе се продолжи наесен.
Тој посочи дека откако го увиделе индексот на т.н. ИКТ писменост на граѓаните во земјава кој што го објавуваат Обединетите нации, Светска банка и Европската Унија утврдиле дека може да биде многу подобро и затоа почнал проектот за обука на граѓаните во сите 22 интернет клубови во Македонија.
„Ангажиравме експерти, наставници кои можат да предаваат на два модули, канцелариско работење и пребарување и комуникација преку интернет. Од над 900 пријавени, половина од нив активно ја следеа обуката. Секој слушател на обуката доби формулар за да даде оценка за предавачите, просториите и квалитетот на обуката. Добивме просечна оценка 4,8, рече Ивановски и додаде дека целта на проектот е постигната и тоа дозволува наесен да се спроведе уште една обука“, рече Ивановски.
Ивановски апелираше до граѓаните уште отсега да се пријавуваат на бесплатниот телефонски број 15111 во Министерството за да следат обука од септември.