Со оглед дека општина Тетово не ја искористи законската можност во рок од три дена да поднесе жалба на Решението на Државниот инспекторат за локална самоуправа за стопирање од извршување на Одлуката на Советот на општина Тетово од 31 јануари со која Рамуш Харадинај беше прогласен за почесен граѓанин на општината, локалната власт на општина Тетово се согласува со Решението на Државниот инспекторат за локална самоуправа.
Општина Тетово има законски рок од 3 дена да го обжали Решението на Државниот инспекторат, со што на министерот за локална самоуправа му се дава законски основ, во второстепена постапка да го поништи Решението на Државниот инспекторат за локална самоуправа.
И покрај постојаната комуникација со локалната власт на општина Тетово, жалам што тие не покажаа воља да поднесат жалба во законскиот рок, како услов министерот за локална самоуправа да го поништи Решението на Државниот инспекторат за локална самоуправа. За жал, таквото, политички неодговорно однесување на локалната власт на општина Тетово, не по прв пат ги доведува во прашање интересите на општината и на нејзините граѓани.
Во секој случај, како министер за локална самоуправа ќе ги искористам сите мои законски надлежности за преиспитување на Решението на Државниот инспекторат за локална самоуправа и на директорот Ванчо Шехтански.
