Министерот за одбрана на Република Македонија, Талат Џафери, денеска престојува во посета на контингентот од Армијата на Република Македонија која е во рамки на ЕУФОР-АЛТЕА во Босна и Херцеговина.
За време на посетата на медицинскиот тим во кампот Бутмир, во Сараево, министерот Џафери, соопшти денеска МО, посочил дека македонските мировници во континуитет ги прикажуваат своите вештини и способности, што недвосмислено укажува на мисијата на АРМ како постојан придонесувач кон глобалниот мир, стабилност и безбедност.
Министерот Џафери положил и цвеќе на споменикот на трагично загинатите припадници на АРМ во хеликоптерската несреќа кај Катлановско Блаце.
Припадниците на контингентот Алтеа-14 во операцијата ЕУФОР-АЛТЕА во Босна и Херцеговина извршуваат поголем број задачи, со фокус на давање медицинска поддршка за ЕУФОР-АЛТЕА и за персоналот во базата „Бутмир“ во Сараево.
Република Македонија во мисијата АЛТЕА учествува од 2006 година и тоа со хеликоптерски деташман до 2008 година и со медицински тим, во моментов 14.ротација. Дополнително, од 2007 година, Република Македонија го зголеми своето учество со еден помошник-правен советник во Командата на ЕУФОР, додека од 2008 до 2012 година и со подофицер за превентивна медицина.