Заедно со колеги пратеници ќе го блокираме предлог – законот за надворешни работи, каде за амбасадор се дозволува да има и друго државјанство, освен македонско, најави на „Фејсбук“ пратеникот од ВМРО – ДПМНЕ, Антонијо Милошоски.
„Тоа е погрешно решение и ќе поднесеме 300 амандмани“, стои во објавата на Милошоски и наведува дека за блокадата имаат три причини.
Прво, затоа што измената е произволна и претставува обид законот да се прилагоди на неколку персонални решенија на владините партнери за пополнување на амбасадорски позиции.
Второ, овие измени, како што наведува Милошоски, се спротивни на Законот за класифицирани информации според кој неопходен предуслов за кандидатот за амбасадор да добие „безбедносен сертификат со степен Државна тајна“ е да не е државјанин и на друга држава, а амбасадор без безбедносен сертификат не е амбасадор.
Третата причина за блокада на предложениот закон Милошоски вели дека е тоа што дипломатијата, како и безбедноста, е сензитивна професија каде лојалноста кон матичната држава Македонија не смее да биде доведена под знак прашалник.
Милошоски на „Фејсбук“ објави дел од амандманите кои ќе ги поднесат за блокада на предложениот закон.
Повлекување или отфрлање на предложените измени на Законот за надворешни работи во петокот, преку соопштение, побара и Македонскиот дипломатски синдикат. Од Синдикатот сметаат дека не е целисходно, ниту сериозно по брза постапка да се прават измени на постојниот Закон за надворешни работи кога во завршна фаза е подготовката на предлог – текст за целосно нов закон за надворешни работи