Нема да се издадат државјанства додека не се направат потребните проверки од страна на Агенцијата за национална безбедност. Премиерот Димитар Ковачевски посочи дека го разбира проблемот со блокираните барања, кои дел се со истечени рокови во кои требало да се одговорат. Но, посочува, се работи со зголемено темпо.
„При формирањето на АНБ тие од нивната претходничка од службата за државна безбедност имаат наследено необработени над 20.000 барања. Темпото тогаш било помало од темпото сега, во однос на проверката на барањата. Ако тогаш се одговарало на 100-200 барања во тек на месец, сега е зголемено над 1000 барања. Проверките се подолги и опфаќаат сложени прашалници од порано, бидејќи сме членка на НАТО“, рече Ковачевски.
Тој додаде дека за прашањата поврзани со државјанството ќе ја информира и АНБ, со цел, доколку постои можност, дополнително да се зголеми темпото на работа.
Во Агенцијата за национална безбедност, на проверки се заглавени над 2.000 барања кои се процесираат.