Антонијо Милошоски од ВМРО-ДПМНЕ денеска во изјава за медиумите кажа дека во име на пратеничката група на ВМРО-ДПМНЕ и коалицијата, изразувал разочарување, не толку од пратениците на ДУИ или од Алијансата на Албанците, колку од пратениците од Охрид, Томислав Тунтев и Жаклина Лазаревска, што не прифатиле ниту еден интервентен амандман од 2 милиони евра кој би можел да биде на располагање на граѓаните кои претрпеле штети во Ресен, Охрид и Струга по серијата земјотреси што се случија минатиот месец.
-Досега имаме информација во трите општини има над 850 пријавени штети на лични, приватни објекти, а истовремено се смета дека ќе биде потребно да се провери статистиката на одредени јавни објекти како што се училишта, градинки, цркви, џамии, посебно во постариот дел на Охрид кои што би можеле да имаат претрпено некои оштетувања, но не мора веднаш и да се видливи. И затоа цениме дека со ова пратениците од Охрид пропуштија можност да алоцираат мала сума, но сепак важна сума на средства која што ќе може после проценките на овие штети да им биде од помош на Охриѓани, Стружани и Ресенчани, рече Милошоски.