Пратеникот на ВМРО-ДПМНЕ, Антонијо Милошоски рече дека разговорот на премиерот Зоран Заев со комичарите кои се претставија како Порошенко и Столтенберг е сериозен дипломатски скандал и дека со тоа е нанесена штета на државата.
„Сметам дека разговорот на премиерот Заев со лажните дипломати е сериозен дипломатски скандал. Со ова е нанесена штета и на Република Македонија на репутацијата на надворешната политика и е нарушена довербата заради споделување информации“, рече Милошоски и додава дека „министерот Димитров требало да го информира како да разговара со дипломати и дека има протокол што го утврдува терминот за разговори и теми“.
– Ваквото грубо кршење на протоколот е доволна причина за оставка на Заев, Димитров и Телевски. Ваков скандал досега се нема случено на ниту еден државник што се занимавал со меѓународни прашања, кажа пратеникот Милошоски.
Премиерот во видеото со лажните дипломати разговара за надворешната политика – преспанскиот договор, референдумот, односите Србија-Косово, Украина, односите со Русија, ЕУ и НАТО.