Фатмир Бесими, вицепремиерот за евроинтеграции, на собраниска комисија изјави дека за неуспехот за добивање датум на јунскиот самит на ЕУ се виновни македонските државни институции, а не Грција.
Ова на виделина ја извади многу пати повторуваната новинарска констатација дека нешто „шкрипи“ во коалицискиот брак.
И секогаш ставот од владата беше ист – Коалицијата редовно функционира, нема проблеми и за се се разговара.
„Фатмир Бесими треба да размисли за оставка ако смета дека не може да го координира процесот на приближување на Македонија кон ЕУ“, изјави Антонио Милошоски, пратеник на ВМРО-ДПМНЕ и поранешен министер за надворешни работи за ТВ 24 вести.
Ако некоја институција потфрлила во процесот на евроинтеграции, а токму Бесими е нај одговорен за тој процес, тогаш тој треба лично да си преземе одговорност, зошто не реагирал навреме и можеби да размисли да поднесе оставка ако смета дека не може да го координира тој процес, му порача Милошоски на вицепремиерот задолжен за евроинтеграции.
За Владата пак, единствен виновник е неразумното однесување на нашиот јужен сосед. Али Ахмети беше јасен, последниот предлог на медијаторот Метју Нимиц да биде ставен на маса, бидејќи е добра основа за компромис меѓу Македонија и Грција. Ахмети, како рок за решавање на спорот го посочи месец декември.