Кандидатот на ВМРО-ДПМНЕ за градоначалник на Охрид Митре Милошевски во денешното негово предизборно обраќање пред јавноста најави реконструкција на повеќе градски улици.
– Патната инфраструктура и транспортот се лицето на градот. Изградбата и одржувањето на локални патишта овозможува одржлив развој на градот како туристички центар и услови за безбеден и динамичен сообраќај. За убав град реконструкција на улиците: „Абас Емин“, „АСНОМ“,„Егејска“ и „Македонски просветители“, „Јордан Мијалков“, „7 Ноември“, „Јане Сандански“, „Прва Македонска ударна бригада“, рече тој.
Притоа најави дека во мандатот ќе спроведе асфалтирање и уредување на тротоари на повеќе улици низ градот, како и уредување на пешачка патека од селото до автокампот Љубаништа, сервисни улички во селата Љубаништа и Трпејца, Долно Коњско, Рача, Велестово, Рамне, Подмоље, Орман, Горно Лакочереј и Долно Лакочереј, Велгошти, Лескоец, Косел и Вапила.
Милошевски уште најави набавка на инсталација на асфалтна база во едно Јавно претпријатие.
– Охрид мора да биде безбедно место за живеење преку изградбата на ефикасен систем на превенција и заштита од пожари, рече тој најавувајќи изградба на хидрантска мрежа, набавка на нова опрема за противпожарна станица, курсеви за пожарникари на меѓународни семинари, набавка на нови возила, како и специјален пловен објект за превенција и интервенирање при итни ситуации во медицинска, противпожарна, спасувачка цел по охридското крајбрежје.